中國式數學題: 內地今日出咗首季GDP

[emily]

馬索諾

中國式數學題
1）內地今日出咗首季GDP，成績唔錯，升5.3%。
2）同日公布埋「三頭馬車」數據，其中首季固定投資按年升咗4.5%，去到10萬億元人民幣，勁過市場預期升4%。
3）去到依到，又出現中國式數學難題，好耐之前寫過篇內地出入口數據嘅post，都係有條計極都計唔到嘅數學題，今次都係。
4）言歸正傳，今次固投條數有咩問題呢？話說舊年國統局公布條數，2023年首季固投係按年升5.1%，去到10.73萬億元人民幣。咁今年得返10萬億元人民幣，點解會計到按年升4.5%？
5）官方今次有解畫，特登highlight咗今年數據同上年已公布的同期數據唔可以直接比較，因為有三大原因，包括（一）加強在庫投資項目管理，部分不符合投資統計制度規定的項目退出了調查範圍。（二）加強統計執法，對統計執法檢查中發現的問題數據，按照相關規定進行了改正。（三）加強數據質量管理，剔除跨地區、跨行業重覆統計數據。
6）如果用返官方嘅計法推返轉頭，舊年首季固投應該得9.57萬億人民幣，即係按年要跌近9%。不過，官方無修正到之前啲數，應該都唔可以咁樣做比較？
7）最後簡單啲講，總之今年首季固投就係按年升咗4.5%，大家唔好深究太多。