做廚師的蘇先生，是 721 元朗襲擊的受害人

[emily]

「真係零期望，你話期望有咩變化？都無㗎啦。」做廚師的蘇先生，是 721 元朗襲擊的受害人，社會大眾對他的經歷並不陌生，當日他下班後在元朗鳳攸北街「雞地」一帶被白衣人追打，留下滿背傷痕，是 721 最具代表性的畫面之一，他亦是極少數會公開身份、容貌，接受採訪講述當日經歷的人。
不經不覺四年過去，隨著另一名受害人、攝影師 Galileo 移民，當下身處香港、還會如此公開講述當日經歷的自由人，恐怕只餘下蘇先生，以及因為 7.21 和他成為朋友的林婆婆等極少數人，「係得我哋兩個，如果喺香港嚟計。」
「所以我都有時覺得，係責任嘅一種。」
蘇先生所指的「責任」，是作為當事人，每年站出來發聲。去年同一時間，筆者都在同一個地方訪問過蘇先生，當時他表示警方最後一次聯絡他，已經是 2021 年的事，又一年過去，警方一如所料，無再聯絡他跟進案件，「唔會求其話咁啱班人食完飯，喺嗰度撞到㗎？百幾二百人，大家都著白色衫撞到﹐邊有咁橋？嗰班咩人、出嚟做咩、策劃嘅係邊個，全部都未有答案。」
「係條氣唔順，件事我唔可能就咁由佢。」
雖然說「條氣唔順」，但蘇先生亦心知肚明，作為一個市民調查、尋真相的權力，他完全沒有，這四年蘇先生當然都有過「算數啦」的想法，畢竟要無時無刻提醒自己尋真相、查責任，既不現實亦令人疲累，「我係變咗，將呢件事融入咗生活，係定期會做嘅事。」
蘇先生提出了一個有趣的比喻，於他而言出來講 721，有點像交電費、交水費，「唔好將佢睇得太重，又唔好完全無，好似交水電費咁，唔係話好緊要時時記住，但係會去做。」
這種心態的轉變，可能不少人都有過，有些事不必無事無刻掛在口邊，而是作為生活的一部分。正如今年六四，警方在銅鑼灣一帶嚴查，將著標語衫的、帶電子蠟燭的、讀詩集的、祈禱的，全部一股腦帶走，學者李立峯撰文分析，官方不是要你忘記，而是要你配合他們展示你已經忘記，而蘇先生做的，就是每年站出來大聲說，他記得。
「咁你打算講到幾時？」
「到有一日我無機會講，或者再無傳媒或者機構搵我。」
也是，過去訪問過蘇先生的傳媒，不少已經消失，尚存的這四年經歷了很多變化，曾經在港台做過《721 誰主真相》偵查報道的蔡玉玲，被控查車牌行使虛假文書，折騰兩年打到終審才脫罪。無論如何，現實是今年還會找他講這個「年經」的傳媒，只有三間，清一色都是網媒，其中一間就是蔡玉玲自己成立的《集誌社》，還有做 721 相關報道的傳媒亦寥寥無幾，「有時悲觀啲講，啲網媒可能死得快過我，所以有人搵我咪繼續講囉。」
「唯有係鬥長命，睇下係我離開香港、離開個世界先，定係最後有答案先。」
「但我暫時無離開嘅打算。」蘇先生笑著說，「因為窮。」

[emily]

7.21
四週年
終身不忘
今世仇恨