#陳廣池法官
#0721元朗 #721唔見人 #審訊 [26/25]
A1: 林卓廷 (43) / A2: 庾 (35)
A3: 陳 (37) / A4: 葉 (31) / A5: 鄺 (26)
A6: 尹 (48) / A7: 楊 (26)
林卓廷因另案已還押逾36個月，就本案己還押2個月（去年12月14日撒消保釋）控罪： 暴動（所有被告）
被控於2019年7月21日，在新界西鐵元朗站大堂連同其他身份不詳的人參與暴動。
干犯香港法例第245章《公安條例》第19(1) 和 (2) 條。
案情資料：
控方代表： #程慧明 高級檢控官 及 #岑頴欣
辯方代表：
A1代表：#黃錦娟大律師
A2代表：#李百秋大律師
A3代表：#潘熙資深大律師
A4代表：#鄭凱霖大律師
A5代表：#周慶澎大律師
A6代表：#黎建華大律師
A7代表：#曾敏怡大律師
============
[10:18] 開庭，因視像系統有問題
案件管理陳官明天下午有事，本案不會開庭。
林卓廷繼續作供
辯方主問黃錦娟大律師給林卓廷睇閉路電視和出入閘機的位置圖，確認兩個傷殘人士的閘門，方便隨後睇片。
播放P7N(2) 23:00:50～23:01:05 由閘外影向付費區內的閉路電視，畫面在開始時，隱約見到林卓廷的身影，左邊見到有人噴水，林縮後在人群中再見唔到。官
畫面見到有幾多把遮？點解開遮？林：前邊見到有六把，後邊唔知，因為外邊有人掟嘢，開遮擋住，自己縮後咗，因為驚被掟中。
官
當日有無落雨？林：在灣仔時無
律師：承認事實之中有天文台嘅報告，有驟雨，局部地區有雷暴。
呈上控方截圖P8(D1-27)，指出在23:01:16時林卓廷停在走廊有動作。
P7M(2) 23:01:04 閘外影向付費區內的閉路電視，和 P7H OS72 00:10~00:15 ，見到林卓廷由柱嘅一邊移到扶手電梯底；林解釋因為縮後咗，視線受阻，睇唔到現場環境，希望睇住施襲者，慢慢從人群之中走去另一邊睇住。播放 FB 直播，畫面仍然影住射水的閘口，見唔到林。FB 17:55~18:01，林卓廷在月台，右手揸住把遮，林稱有人畀嘅；回帶至16:35～16:50，實時係23:02:34開始，林稱懵良帶頭衝入付費區，市民逃跑，林去到樓梯前，有位年長嘅女士俾咗一把遮。播到17:31，見到市民跑上樓梯，有人大叫，背景有拍拍聲，林稱聲音係來自白衣人打人。入列車，當時白衣人未上嚟，見到有市民頂住車門，問後邊仲有無人，等埋其他市民。
官
頂住門嘅市民係着咩色衫，當中有無白衣人？頂住幾多道門？ 林：無留意係咩色，無留意咁仔細，幾道門啦。
林卓廷話白衣人上過月台兩次，第一次係幾個人，第二次係好多人。
FB 17:31~1745 林卓廷冼卓嵐入咗同一卡車，林企近門口，有人嗌「仲有無人呀？」FB 17:55～18:01 林卓廷再出返月台，因為相信架車開唔到，車門頂住咗，擔心樓梯仲有市民被襲擊，想知白衣人嘅動向，所以出去睇吓。官
仲行出去，在列車內行去車頭，唔使出車，你無咁危險林：心情上係矛盾嘅，想保護市民，擔心樓梯有市民被襲擊受傷，匿在車廂又開唔到車，幫唔到人，見機行事。
FB 18:03~18:22 冼「Z打咗俾你幾次」，林「唔聽」，Z 就係黃偉賢。因為下邊好嘈，白衣人追打市民，行去樓梯口睇吓。官
樓梯唔見打人，知唔知另一個黑衣人開遮做乜嘢？林：樓梯底有啊！佢喝止白衣人打人。
FB 18:49~18:59 林卓廷稱感覺白衣人開始上嚟，退入車廂，「頂住門口，唔好俾佢走入嚟，嗰邊有人入嚟」。官
呢個畫面見到列車與樓梯口中間無白衣人，你同唔同意？林：呢個畫面係，衝上嚟都要時間㗎。
@19:20 白衣人上到月台施襲，林大叫「大男人頂住前邊，女士企後邊」。官
你係咪大男人？林：梗係啦！
19:30～20:00 大批白衣人用不同武器襲擊市民，林卓廷曾經踏出月台，因為見到有人倒地，想出去救佢，但白衣人即刻埋嚟，唔想接觸，唯有退後。隨後播放白衣人入車廂打人的兩分鐘片段，哀嚎聲、慘叫聲不絕
「唔好入嚟」，「唔好挑釁」，「停手」，「女仔企入邊」，「放工返屋企」… 尾段有廣播「本班列車暫停服務，請乘客離開車廂」官
當時有無聽到廣播，係咪第一次聽？林：聽過幾次，唔記得係咪第一次聽，聽到係好荒謬
官
知唔知點解白衣人無入車廂，在外面徘徊？林：唔知，佢哋在唔同門口出出入入打人。
[11:30~12:02] 小休
林卓廷補充，白衣人掟嘢入嚟，用棍用藤條走入嚟打人，市民開遮係防衛自衛，無用遮襲擊佢哋。
FB 22:30~22:43 有孭住背囊的市民向門口單腳跪低，阻止白衣人衝入，再拾起地上的眼鏡交還白衣人，最後郤被白衣人一腳踢跌。懵良在門口指駡林卓廷，話最衰係佢，追住林嚟打，林用長遮檔咗幾吓，被打至飛脫，佢試過打中扶手，改為把木棍水平向前直插，林被打至手腕骨裂咗，嘴角爆開，輕微暈倒在地，身後有乘客阻止。
FB 25:25~25:50 白衣人離開月台，列車開出。林在兆康落車，去咗屯門醫院，嘴角縫咗16至18針，手臂骨裂，頭頂瘀傷。FB 28:25~29:20 林卓廷與乘客有對話，叫唔好在朗屏站落車，過晒元朗先落，因為唔知白衣人會在元朗邊個地方打人，去到兆康站落車。林講述為何唔離開付費區當時感覺已經被包圍，一心係要入元朗站保護市民，感到白衣人想衝入去打人，出付費區係送死，退上月台會追打，比隔住欄杆更危險，如果落單被圍毆會無命。
亦因為報咗警，深信警察會好快到，到咗就會安全，當時認知係無安全嘅路線離開，有市民問警察幾時到，講咗好快會到，道德上唔可以離開。
有喝止白衣人、拉後市民、講咗二三十次「唔好郁、企後啲」等等嘅說話，提醒市民安全，喝止施襲，希望捱到警察到場，叫人頂住，自己點可以在危難關頭走咗去，唔可以接受。
做緊直播亦唔可以離開，留證據給警方做調查。
官
唔做直播可以錄影㗎？記錄白衣人嘅動作，叫人拍攝，唔使做直播。林：過往在現場都係做直播，想做紀錄，讓市民監察工作，無嘢要隱瞞，公眾即時知道發生咩事！
官
以往無咁危險，做少一次？林：開始嘅時候唔係危險，唔知事後發展到咁，無水晶球，做直播無壞處，俾公眾監察係好應該嘅事情。唔做直播做錄影都要在現場㗎，唔通掉低個手機？
雖然去到某一階段有部份白衣人行遠咗，但唔係好遠，仲有人係度，嗌一聲3秒鐘就到，如果退到好遠，就會思考吓，如果叫人走，孭唔起責任，當時隔住圍欄安全啲，諗住越耐警察就越快到。
官
咁你又打開輪椅通道？林：當時大堂圍毆一名女子和何桂藍，想救佢哋，一開閘白衣人就衝埋嚟。
當時無心情去理列車，要喝止白衣人，要拉住市民，精神極之繃緊，白衣人係有組織，揸住長棍藤條，係精壯男子，紋身，要防止黑社會打人，心力交瘁，極之惶恐，盡力去做，做到幾多得幾多。
律師問林在不同階段有不同行為說話，是否認為有造成挑釁白衣人？陳官制止，認為產生嘅後果，係由法庭裁決，唔係由林認為。
律師改為問咁你嘅目的係做咩？目的係盡量阻止，警告白衣人襲擊市民，叫企後啲，提醒市民會遇襲受傷，唔好郁手，唔好惡化，緩和到就最好。畫面見到白衣人退後再返嚟，當時係多咗好多白衣人，有組織，睇住白衣人在閘外用木棍由上而下咁打一個人，風險好高，會搞出人命，盡力喝止，就係在場嘅角色。
上月台係無諗住做乜，因為出閘會無命，只係得返上月一條路，係死胡同，車開唔到，唯有死頂，叫大男人企前邊女士後邊，盡量保護到、檔得到幾多就幾多，車廂內好多女士，大家都係極之惶恐。
當日嘅片段由冼卓嵐交咗畀警方，係好重要嘅證據，對於警察遲遲未到，林係好憤怒，但私人憤怒唔應該影響處理公眾事件，唔單止交片段，有去提供證人口供、認人，認出若干施襲者，做咗四次證人口供，呈上一份警方給林的信件。
當日搭車入元朗係無諗住參加暴動，去到付費區亦無參與暴動。
主問完畢
D7 律師盤問FB 01:15 有男聲「我係第一個到，佢哋拎咗木棍同刀仔…」，林卓延表示唔識該男子。其他律師無盤問
[13:05] 休庭，控方申請押後至明日(12/2) 10:00 開始盤問。
==========
直播員按：佩服 #黃錦娟大律師 全程都好冷靜
公眾席上有人忍受不住無差別襲擊所帶來的情緒
